VRUUGER

Ut begin van joekskepèl Poepeloestig

Begin 2004, de vastelaovend in Bliërick haet al bijna twië daag de euverhand in os dageliks bestaon en zörg d'r veur det d'r vuul gefees, gezonge, gelache en natuurlik gedronke wuurd. Die twië daag die zien veurbeej gevlaoge, weej de kinder van joekskepèl De Nachravers met hun aanhang en vrinde, zien al de ganse tied same op paad. Netuurlik hebbe we zondaags meigelaupe in de groete optoch daor Bliërick, de meiste veur ut Joeksmobiel van De Nachravers, andere met unne andere groep. Maar daornao komme we waer same in de wortelekoel waor we as vrindegroep beejein staon en same geniete van deze fijne tied. Veur de grap wuurd ut instrument beej pap of mam oet de hand getrokke en trach se d'r unne solo oet te perse. De klanke die geproduceerd waere zien neet van die aard det minse in eine kier good rooje welk nummer d'r gespeuld wuurd, maar ut belangriekste is det de fun d'r vanaaf straolt.

Vastelaoves Maondaag, nao un paar eurkes oplaaje van de batterie daor wat gerös te hebbe en un paar eier met spek te hebbe genuttigd, hijse un paar jonges van de vrindegroep zich waer in eur vastelaovespekske. De planne zien un nao stad te vertoeve en dus wuurd dr unne taxi gebeld, de wachtied bedruug un half eurke. De jonges besloete um alvas boete te gaon staon en paote zich taege de paol met ut naambördje van de Corneillestraot. In ut gesprek wat ze voere in de tied det ze wachte, kump terspaake wie tof ze ut zuuje vinde um auk in ein joekskepèl te kinne speule. Net as eur elders deil oetmake van un belangriek aspec umtrend ut hiele vastelaoves gebeure, de muzikale klanke waor de hiele folklore op drief dees veer daag…Tuut! Tuut!… de taxi tuutert de jonges wakker, die same aan ut druime zien euver ein eige joekskepèl. In de taxi is ut enige onderwerp wat aan bod kump ut beginne van un joekskepèl, ze rake d'r neet euver oetgepraot. Ze laote zich veur de Maaspoort aafzette en gaon opzeuk nao de res van eure vrindegroep, zoedet die ouk mei kinne druime van un eige joekskepèl. De reacties zien euverweldigend en idderein zuut ut wal zitte of baeter gezag staon met un trompet, saxofoon, schuuftraot, … taege de mond. De hiele aovend wuurd d'r euver niks anders gespraoke en wuurd ut eine naor de andere ideeje naor veurgedraage um dit te kinne verwezelikke.

Ein aantal daag nao dae bewuste aovend waor ut iedeej is ontstaon… In de eine hook van de kelder beej Eijdem blaosinstrumente klink de toënledder oet ein trompet. Oet unne andere hook kump ouk geluud, in vakterme wuurd dit ut scheure op ein schuuftraot geneump. Maar ut klink neet hielemaol wie ut zuuj motte klinke, um ut op zien zachs oet te drökke, ut is neet hielemaol zuuver. De verkuiper leet ut trompetje waor hae de toënledder op haet gespeult aan de kant en pak oet unne standaard ein saxofoon. Ouk met dit instrument kint hae euverwaeg en luut ut os huure, iers unne toënledder en daornao ein of ander Venroojs vastelaoves liedje. Idderein zuut ut al veur zich dette met ut instrument watte haet oetgekaoze de show steelt op de buhn van de Staay of dette ein vastelaovesliedje ten gehuure brink in ut hert van Bliërick op de Kloësterstraot. Met in de kofferbak ein of mierdere instrumente begaeve we os waer nao Bliërick en gaon thoes pronke met os nieje aanwinste.

In de waeke die volge gaon we opzeuk nao un plaats veur te repetaere. Ut vinde van ein kroeg waor we kinne werke aan ozze muzikale carrière wuurd snel gevonde. Ein paar jonges die dinsdaags ein pielke goeie in Kefee Ald Bliërick stelle veur um te kieke of d'r meugelikheden zien veur daor te repetaere. Ans en Peter, op det moment de eigenare van Ald Bliërick, stumme in met os veurstel um donderdaags te repetaere. Nao wat duudelike aafspraoke te hebbe gemak met Ans en Peter begaeve we os met z'n

alle dae ierst volgende donderdaag nao Ald Bliërick. We drinke met z'n alle wat en probaere daornao wat klanke ten gehuure te bringe. Al snel komme we d'r achter det ut neet meivelt det traote en we besloete det we maar ens op zeuk motte gaon nao emus dae os kin liere de instrumente te bespeule. Maar bliekbaar is ut geluud wat we producere van die aard, det d'r toch minse zien die ut leuk vinde wat we doon. Ze vinde ut zelfs zoe leuk det ze aangaeve det ze zich gaer beej ozze groep wille voege, um ouk onderdeil oet te make van jeugd die aan muzikale ontspanning duit. De twië vrindegroepen waere beejein gesmolte en de joekskepèl is gevormp, later zulle via via mier minse de groep binne dröppele um de hiele bezetting kompleet te make.

In ut stökske heej baove al heb geej al gelaeze det we hard op zeuk mooste gaon nao emus dae os ut vak van muzikant onder de kneen woel bringe. We hadde op inkele nao nog noëits un instrument bespeult en dus meus ut emus zien dae van alle merte thoes waar. Um zoe emus te vinde, waas neet ut mekkelikste onderdeil. Daor ut inschakele van de alde rotte in ut vak, de papa’s en mama’s die speule beej De Nachravers, wuurd dit bemekkelik en al gauw hebbe we un aantal geschikte kandidate op os lieske staon. Nao un aantal tillefoontjes richting Bas Clabbers bliek al snel det dit de gene is dae we motte hebbe. Unne jonge jong van ozze laeftied, net aafgestudeerd als dirigent. Wat ouk neet onbelangeriek is dette de veurman is van de Bliërickse hofkepèl. Ouk Bas guef aan dette same met os deze oetdaaging aan wilt gaon en luüt al geliek beej zien ierste repetisie zeen det hae in staot is wondere te verrichte. Want onder leiding van Bas lök ut os um same, te geliek, bijna zuuver ein en dezelfde toën oet os instrumente te laote komme…

Ut Venloos woordebook wuurd maar waer ens veur de zoevuulste kier daor geblaaderd, um op zeuk te gaon nao ut woord of de weurd die achter joekskepèl motte komme.Al verschillende suggesties zien de revue gepaseerd, maar de naam waor we ut mei ins is zit dr nog neet beej. Lang blieve we staeke beej joekskepèl “Neet Moëi, Waal Hard”, maar neet idderein zuut dit zitte. Nao un lang moment van stilte röp d'r eine dette ut haet gevonde: Joekskepèl “Poepeloestig”!! De zuus en huurs bijna de hiele groep dinke, is ut wat of is ut nix?! Un paar kier wuurd ut daor verschillende gezag en langzaam aan begint ut good te klinke: Joekskepèl “Poepeloestig”. De oetleg van ut woord “Poepeloestig” haet betrekking op wie we zien, vrolijk en oetgelaote. Nog maar unne kier euverlegge um te polse of we allemaol instumme met deze naam en oeteindelik zien we ut same ins, Joekskepèl “Poepeloestig” is gebaore…